اہلِ سنت و الجماعت کا یہ متفقہ اور اساسی عقیدہ ہے کہ انبیاءِ کرام علیہم السلام کے بعد کائنات کی افضل ترین اور مقدس ترین ہستیاں صحابہ کرام رضوان اللہ علیہم اجمعین اور اہلِ بیتِ اطہار علیہم الرضوان ہیں۔ ان نفوسِ قدسیہ کی محبت، تعظیم اور توقیر عینِ ایمان اور مدارِ نجات ہے، جبکہ ان سے بغض رکھنا، یا ان کی ادنیٰ سی توہین و تنقیص کرنا گمراہی اور ایمان کے سلب ہونے کا باعث ہے۔ جیسا کہ احادیثِ متواترہ اور نصوصِ قطعیہ سے ثابت ہے کہ اہلِ بیت کی محبت حضورِ اقدس ﷺ کی محبت کا حصہ ہے۔ چنانچہ صحیح مسلم میں سیدنا زید بن ارقم رضی اللہ عنہ سے مروی ہے کہ رسول اللہ ﷺ نے غدیرِ خم کے مقام پر خطبہ ارشاد فرماتے ہوئے تین مرتبہ تاکیداً فرمایا:

 "أذكركم الله في أهل بيتي، أذكركم الله في أهل بيتي، أذكركم الله في أهل بيتي۔"

 ترجمہ: "میں تمہیں اپنے اہل بیت کے معاملے میں اللہ (کا خوف)یاد دلاتا ہوں ( کہ ان کی محبت و تعظیم میں کمی نہ کرنا)۔" (صحیح مسلم، کتاب فضائل الصحابة، باب فضائل علي بن أبي طالب)

 ایسے ترمذی شریف میں سیدنا عبداللہ بن عباس رضی اللہ عنہما سے روایت ہے کہ رسول اللہ ﷺ نے فرمایا:

 "أحبوا الله لما يغذوكم من نعمه، وأحبوني بحب الله، وأحبوا أهل بيتي لحبي۔"

 ترجمہ: "اللہ سے محبت کرو اس لیے کہ وہ تمہیں اپنی نعمتوں سے نوازتا ہے، اور مجھ سے محبت کرو اللہ کی محبت کی وجہ سے، اور میرے اہل بیت سے محبت کرو میری محبت کی وجہ سے۔" ( الترمذي، کتاب المناقب، باب مناقب أهل بيت نبی)

 ایسے امام قاضی عیاض مالکی رحمۃ اللہ علیہ اپنی مایہ ناز تصنیف الشفاء بتعریف حقوق المصطفیٰ میں لکھتے ہیں:

 "ومن توقيره صلى الله عليه وسلم وبره: بر آله وذريته وأمهات المؤمنين أزواجه... فإن ذلك مما دلت عليه الآثار، وتقرر عند الأئمة والأخيار۔"

 ترجمہ: "اور رسول اللہ ﷺ کی تعظیم اور ان کے ساتھ حسنِ سلوک میں سے یہ بھی ہے کہ آپ ﷺ کی آل، ذریت اور امہات المؤمنین سے حسنِ سلوک کیا جائے۔ یہ وہ بات ہے جس پر احادیث دلالت کرتی ہیں اور ائمہ و اخیار کے ہاں یہ طے شدہ عقیدہ ہے۔"

 اہلِ بیت کی توہین اور بغض نفاق کی علامت ہے چنانچہ مسلم شریف میں خود امیر المؤمنین سیدنا علی المرتضیٰ رضی اللہ عنہ کا فرمان منقول ہے:

 "والذي فلق الحبة وبرأ النسمة، إنه لعهد النبي الأمي صلى الله عليه وسلم إلي: أن لا يحبني إلا مؤمن، ولا يبغضني إلا منافق۔"

 ترجمہ: "اس ذات کی قسم جس نے دانے کو پھاڑا اور جان کو پیدا کیا، بے شک نبی امی ﷺ کا مجھ سے عہد ہے کہ مجھ سے صرف مؤمن ہی محبت کرے گا اور مجھ سے صرف منافق ہی بغض رکھے گا۔" (صحیح مسلم، کتاب الإيمان، باب الدليل على أن حب الأنصار وعلي من الإيمان)

 ایسے مستدرک للحاکم میں سیدنا ابو سعید خدری رضی اللہ عنہ سے روایت ہے کہ رسول اللہ ﷺ نے فرمایا:

 "والذي نفسي بيده لا يبغضنا أهل البيت رجل إلا أدخله الله النار۔"

 ترجمہ: "اس ذات کی قسم جس کے قبضہ میں میری جان ہے، جو شخص بھی ہم اہل بیت سے بغض رکھے گا، اللہ تعالیٰ اسے ضرور جہنم میں داخل کرے گا۔" (المستدرك على الصحيحين للحاكم، رقم الحدیث: 4717)

 نیز فقہاء احناف رحمھم اللہ نے حضرت علی رضی اللہ عنہ اور اہلِ بیت کی تنقید و سب و شتم کرنے والوں پر سخت احکام جاری کیے ہیں۔

 چنانچہ علامہ ابن نجیم رحمۃ اللہ علیہ "البحر الرائق" میں امام محمد بن الحسن الشیبانی رحمۃ اللہ علیہ کے حوالے سے لکھتے ہیں:

 "وقد قال محمد في كتاب السير الكبير: من سب عليا أو ابغضه أو جعله في ضلال فهو ضال مبتدع مطرود عن الحق، ويخشى عليه الكفر صريحا لأن حبه إيمان وبغضه نفاق۔"

 ترجمہ: "اور امام محمد نے السیر الکبیر میں فرمایا: جس نے حضرت علی (رضی اللہ عنہ) کو برا بھلا کہا، یا ان سے بغض رکھا، یا ان کی طرف گمراہی کو منسوب کیا، تو ایسا شخص خود سخت گمراہ, بدعتی اور حق سے دھتکارا ہوا ہے۔ اور اس پر صریح کفر کا اندیشہ ہے، کیونکہ آپ سے محبت کرنا ایمان ہے اور آپ سے بغض رکھنا نفاق ہے۔" (البحر الرائق شرح كنز الدقائق، كتاب السير، باب المرتدين، ج 5، ص 131)

 ایسے شرح العقائد النسفیہ میں علامہ سعد الدین تفتازانی رحمۃ اللہ علیہ فرماتے ہیں:

 "وأما ما جرى بين الصحابة من المنازعات... فالمخطئ فيه كان على الاجتهاد، لكن الخوارج والنواصب الذين يسبون عليا وأهل بيته صاروا بذلك كفارا أو فساقا ملعونين لمخالفتهم النصوص القاطعة في حقهم۔"

 ترجمہ: "اور جو کچھ صحابہ کے درمیان (اجتہادی) نزاعات ہوئے... ان میں خطا کار بھی اجتہاد پر تھا۔ لیکن خوارج اور ناصبی جو حضرت علی (رضی اللہ عنہ) اور ان کے اہل بیت کو برا بھلا کہتے ہیں، وہ اس فعل کی وجہ سے کافر یا ایسے فاسق ملعون ہیں، ان کے اہل بیت کے حق میں موجود نصوصِ قطعیہ کی مخالفت کرنے کی وجہ سے" (شرح العقائد النسفية، مبحث الخلافة والإمامة، ص 115)

 ایسے علامہ ابن عابدین رحمۃ اللہ علیہ رد المحتار میں لکھتے ہیں:

 "وفي الخلاصة وبزازية: من سب أحدا من الصحابة كأبي بكر وعمر وعلي أو عاب أهل البيت يقتل حدا إن لم يتب، لأن العيب في أهل بيت النبي صلى الله عليه وسلم إيجاء للنبي وإيجاؤه كفر۔"

 ترجمہ: "اور خلاصۃ الفتاوی اور فتاوی بزازیہ میں ہے: جس نے صحابہ کرام میں سے کسی کو، جیسے ابوبکر، عمر اور علی (رضی اللہ عنہم)، کو برا بھلا کہا، یا اہل بیت کی عیب جوئی (توہین) کی، اگر وہ توبہ نہ کرے تو اسے حد کے طور پر قتل کیا جائے گا؛ کیونکہ نبی کریم ﷺ کے اہل بیت میں عیب نکالنا (ان کی توہین کرنا) نبی کریم ﷺ کو ایذا دینا ہے، اور آپ ﷺ کو ایذا دینا کفر ہے۔" (رد المحتار على الدر المختار، كتاب الجهاد، باب المرتد، ج 4، ص 237)

 مذکورہ بالا تمام احادیثِ مبارکہ اور نصوصِ فقہیہ کو پیشِ نظر رکھتے ہوئے، زیرِ نظر سوال میں مذکورہ واقعہ اور مناظر صاحب کی گفتگو نہایت دل آزار، جسارت آمیز اور حدِ ادب سے متجاوز ہے۔ مناظرے اور الزامی گفتگو کے بھی کچھ حدود و قوانین ہوتے ہیں۔ حریف کو زک پہنچانے یا اس کے باطل نظریات کا رد کرنے کے لیے شیرِ خدا، سیدنا علی المرتضیٰ کرم اللہ وجہہ کی ذاتِ گرامی پر "زمین سے چپکنے" یا "رسول اللہ ﷺ کا ساتھ چھوڑنے" جیسے نازیبا الفاظ چسپاں کرنا، اور پھر اس کی بنیاد پر توہین آمیز خاکے اور اشتہارات مرتب کرنا شریعتِ مطہرہ میں سخت حرام اور قبیح ترین فعل ہے۔

 اسی طرح سیدنا امام زین العابدین علی بن الحسین رحمۃ اللہ علیہ، جو زہد و تقویٰ اور علم و امامت کے درخشندہ ستارے ہیں، ان کے حق میں یزید کے سامنے "مجبور غلام" ہونے کا طعن کرنا، ان کی شجاعت پر حرف اٹھا کر ان کی امامت کا مذاق اڑانا ہے اور انگریزی زبان کے تذلیل آمیز لفظ "Weasel" (جو ایک مکروہ جانور کے لیے مستعمل ہے) کو ان کی ذاتِ عالی سے منسوب کر کے اشتہار بازی کرنا،شرعا حرام اور ایسا گھناؤنا جرم ہے جس پر جتنا افسوس کیا جائے کم ہے۔ یہ حرکتیں قطعاً اہلِسنت والجماعت کا نہ شیوہ ہیں اور نہ ہی یہ ان کا طریقہ ہے۔اور مناظر صاحب کی یہ تمام گفتگو قطعاً الزامِ شرعی نہیں بلکہ گستاخیِ اہلِ بیت کے صریح زمرے میں آتی ہے۔ علامہ ابن عابدین شامی رحمۃ اللہ علیہ کے فیصلے کے مطابق، اہلِ بیت میں عیب نکالنا یا ان کی توہین کرنا درحقیقت حضورِ اکرم ﷺ کو ایذا دینا ہے، اور حضور ﷺ کو ایذا دینا کفر ہے۔ لہٰذا مناظر صاحب اور ان کے ہمنوا افراد پر لازم ہے کہ وہ فوراً سچے دل سے اعلانیہ توبہ و استغفار کریں، ان توہین آمیز اشتہارات کو تلف کریں اور آیندہ کے لیے ان قبیح حرکات سے باز رہیں۔

فقط واللہ اعلم

فقط واللہ اعلم