۱۔ واضح رہے کہ جب کاروبار والد کا ہو اور بیٹے اس میں ساتھ محنت کرنا شروع کردیں تو پھر بھی کاروبار والد ہی کا رہتا ہے، چاہے بیٹوں نے کئی سال محنت کی ہو۔شرعاً بیٹے اپنی محنت کا مستقلاً کوئی مطالبہ نہیں کرسکتے؛ کیونکہ ان کے اخراجات کا پورا ہونا ہی ان کی محنت کا عوض ہے۔

قال ابن عابدينؒ في العقود الدرية في تنقيح الفتاوى الحامدية:

ذكر شيخ الإسلام جلال الدين في أب وابن اكتسبا ولم يكن لهما مال فاجتمع لهما من الكسب أموال الكل للأب لأن الابن إذا كان في عياله فهو معين له (كتاب الشركة، شركة العنان، 1/ 94 ط: دار المعرفة)

البتہ اگر والد ازخود کسی بیٹے کو اس کی محنت کی بناء پر کچھ دے دے تو اس میں مضائقہ نہیں، لیکن بیٹا اس پر والد کو مجبور نہیں کرسکتا۔ لما في مجلة الأحكام العدلية:

كل يتصرف في ملكه كيفما شاء (الكتاب العاشر: الشركات، الباب الثالث، الفصل الأول، رقم المادة :1192، ص: 230 ط: نورمحمد)

۲۔ اگر کاروبار والد کا ہے اور بیٹے اس کے ساتھ محنت کرتے ہیں تو کسی بیٹے کا والد کی اجازت کے بغیر مشترکہ کاروبار میں سائیڈ بزنس کرنا شرعاً ناجائز ہے۔

۳۔ بیوی کی دی ہوئی رقم سے شوہر کا اپنے والد کے کاروبار ہی میں سائیڈ بزنس کرنا شرعاً ناجائز ہے، البتہ مشترکہ کاروبار سے الگ دوسری دکان یا دوسرے شخص کے ساتھ مل کر الگ کاروبار کرنے کی اجازت ہے ، اور بہتر یہ ہے کہ دوسرےکاروبار کا والد کو بتلا کر شروع کرے۔ لما في الدر المختار:

(ولا) يملك أيضا (تجاوز بلد أو سلعة أو وقت أو شخص عينه المالك)؛لأن المضاربة تقبل التقييد المفيد

(الدر مع الرد، كتاب المضاربة، 5/ 650، 651 ط:سعید)
فقط واللہ اعلم